لواحد كان فاكر كل حاجة هتفضل زى ما هى

زمان و أنا صغير, يجى سبع تمن سنين, كنا انا و ولاد خالتى بنتلم عند جدتى و نعد نلعب و نتكلم و كان اكرم ابن خالتى زى اخويا و قريب جدا منى و اصغر منى بكتير. كان بحب ياكل عيش فينو متسقى فى شاى بلبن على الفطار الى جدتى بتسمية فتتة البوبى. هههه

فين ايام فتتة البوبى بتاعت ابن خلتى الصغير الى كنت بشيله دلوقتى اتخرج من الكلية!
سعر الحجات زاد. كلى ما انزل اشترى حجات للبيت افضل افتكر زمان اما كنت بشترى نفس الحاجة بربع او نص الثمن.

مش عايز اتكلم زى جدى بس بصراحة الراجل معاه حق الطفولة احلى ايام العمر فعلا و الحياة بتغير كل يوم و التانى. الفقير الى مكانش لاقى ياكل يبقى غنى و ولاد الناس فى يوم ما يبقوش ولاد ناس و الى كان فوق بقا تحت, و الى تحت طار فوق.

كل حاجة اتغيرت, العيال الى كنت بتلعب معاهم استغماية و كرة فى الشارع اتجوزه ,و خلفو كمان.

الموسيقا الشبابية الى كنت بتسمعها بقت من التراث و الماضى السحيق زى أغانى أم كلثوم و سيد درويش
و لبسك المفضل بقى موضة قديمة
و عربيتك الى كانت على الزيرو قدمت و بقت مكحكحة

الواحد كان فاكر كل حاجة هتفضل زى ما هى
أبن خالتى هيفضل ياكل فتة بوبى و انا هفضل اشيلة و افضل انصحة و ربيه
و هيفضل اقصر منى و هيفضل يسألنى

وصحابى هنفضل نلعب كورة فى باركن العربيات الى تحت و كلهم حيفضلوا عيشين

دلوقتى كل ده انتهى, أما يموت صحبك بتفهم يعنى ايه موت صدمة بس هو دا الواقع
أتارى الموت جزء اساسى من الحياة و أنت مش واخد بالك و فكروه حاجة بعيدة ما تحصلش ليك


الحياة بقت حاجة تانية خالص

العيال كبرت و انا عجزت و ناس ماتت و ناس اتولدت و الحياة مشية

و كلنا لها
سلام